ABŞ hərbçiləri İrana qarşı yeni zərbə planları hazırlayıblar. Bu planlarda Amerika ordusunun arsenalında olan ən böyük qeyri-nüvə silahının - "bütün bombaların anası" kimi tanınan GBU-43/B MOAB aviasiya bombasının tətbiqi nəzərdə tutulur.

Bu barədə CNN telekanalı sözügedən hərbi planlarla bağlı müzakirələrdən xəbərdar olan bir neçə ABŞ rəsmisinə istinadən məlumat yayıb.

Telekanalın məlumatına görə, mümkün hədəflər sırasına İranın enerji infrastrukturu və nüvə obyektləri, o cümlədən "Pikaks" dağındakı obyekt daxil ola bilər.

ABŞ prezidenti Donald Tramp hərbçilərə əlavə hücum ssenariləri hazırlamağı tapşırıb. Vaşinqton və İsrailin qiymətləndirmələrinə görə, İran sözügedən obyektdə öz nüvə proqramının komponentlərini saxlayır.

CNN vurğulayır ki, MOAB bombasının tətbiqi münaqişənin kəskin şəkildə eskalasiyasına (şiddətlənməsinə) səbəb ola bilər. Bununla belə, bəzi amerikalı rəsmilər yeni zərbələrin strateji məqsədlərə çatmağa və müharibəni yekunlaşdırmağa imkan verəcəyinə şübhə edirlər.

Telekanal onu da qeyd edir ki, aralıq seçkiləri ərəfəsində Tramp amerikalıların artan narazılığı ilə üz-üzə qalıb. Tehranla danışıqların perspektivləri isə hələ də qeyri-müəyyən olaraq qalır.