Azərbaycanda kredit bazarında son dövrlərdə həm kreditləşmənin həcmi, həm də bankların kredit siyasəti baxımından müəyyən dəyişikliklər müşahidə olunur. 2026-cı ilin ilk yarısında bank sektorunda kreditləşmənin artımı davam edib və qarşıdakı dövr üçün kredit bazarının inkişafı ilə bağlı gözləntilər də aktuallığını qoruyur.

Mərkəzi Bankın pul siyasəti, kredit faizləri, əhalinin və biznesin maliyyə vəsaitlərinə tələbi, eləcə də bankların risk qiymətləndirmə yanaşmaları kredit bazarına təsir edən əsas amillər sırasında yer alır. Hazırkı gözləntilərə görə, kredit faizlərində kəskin dəyişiklik ehtimalı yüksək deyil.

Bəs kredit bazarında son dövrlərdə hansı əsas dəyişikliklər müşahidə olunur? Qarşıdakı aylarda kreditlərə tələbin artması, yoxsa azalması gözlənilir və bankların kredit siyasətində hansı dəyişikliklər baş verə bilər?

Demokrat.az-a bu barədə açıqlama verən Ruslan Atakişiyev söyləyib ki, kredit bazarında yaxın dövrdə bir sıra dəyişikliklərin baş verəcəyi gözlənilir.

Onun sözlərinə görə, xüsusilə kredit xidmətlərinin rəqəmsallaşdırılması, daha çox əməliyyatın elektron formada həyata keçirilməsi və kreditlərin verilməsi prosesində elektron xidmətlərin keyfiyyətinin artırılması istiqamətində işlərin aparılması ön plana çıxır:

“Bununla yanaşı, bu sahədə çalışan mütəxəssislərin peşəkarlığının artırılması da kredit bazarının inkişafı baxımından əhəmiyyətlidir.

Digər tərəfdən, bazarda kreditə olan tələbin yüksək olması da diqqət çəkən əsas məqamlardan biridir. Əslində, əhalinin kreditə tələbi əvvəlki dövrlərdə də kifayət qədər yüksək olub. Lakin burada əsas məsələ kreditə artan tələbin düzgün və effektiv şəkildə qarşılanmasıdır. Yəni kredit siyasəti elə qurulmalıdır ki, artan tələbatı nəzərə alaraq vətəndaşlara daha əlçatan, şəffaf və keyfiyyətli maliyyə xidmətləri təqdim olunsun.

Bu baxımdan kreditləşmənin genişləndirilməsi ilə yanaşı, vətəndaşların maliyyə yükünün də nəzərə alınması vacibdir. Kredit götürən şəxsin gəliri, ödəmə qabiliyyəti və mövcud borc öhdəlikləri qiymətləndirilməli, kreditləşmə prosesi yalnız kreditə olan tələbin qarşılanmasına deyil, həm də maliyyə risklərinin minimuma endirilməsinə xidmət etməlidir. Rəqəmsal texnologiyaların tətbiqinin genişləndirilməsi isə bu prosesin daha sürətli, şəffaf və rahat həyata keçirilməsinə imkan verə bilər”, - deyə Ruslan Atakişiyev fikrini tamamlayıb.