Təxminən on gündən sonra Ermənistan-Azərbaycan dəmir yolu xətinin bərpa olunacaq iki hissəsində mütəxəssislər araşdırmalara başlayacaq və onların əsasında layihə hazırlanacaq.
“Bunu “Azadlıq” radiosuna açıqlamasında Ermənistan-Azərbaycan dəmir yolunun bərpası proqramının işçi qrupunun rəhbəri, Ermənistan baş nazirinin müşaviri Artaşes Tumanyan bildirib.

Onun sözlərinə görə, işçi qrupun işində Rusiya Dəmir Yollarının mütəxəssisləri də iştirak edəcək.

Baş nazirin müşaviri izah edib ki, tikinti işlərinə başlamaq üçün Ermənistanla Azərbaycan arasında əldə olunan razılaşmalar sənəddə əks olunmalıdır: “Bu, həm ikitərəfli, həm də üçtərəfli razılaşma ola bilər. Ən azı iki tərəf öhdəlik götürməlidir, çünki onlar birlikdə işləməlidirlər. İstiqamətlər və birgə işlər var. Dəmir yolunun Yerasx hissəsinin bərpası aylar, Meğri hissəsi (burada 45 kilometrlik dəmir yolu) isə üç il çəkəcək. Bu işlərin Ermənistana nə qədər başa gələcəyi hələlik bəlli deyil”, - o əlavə edib.