Türkiyə hərəkətə keçdi – Yunanıstandan təhlükəli hərbi plan
Yunanıstanın Rodos adasında pilotsuz uçuş aparatları (PUA) üçün hərbi baza yerləşdirmək planı Ankara ilə Afina arasında yeni gərginliyə səbəb olub.
Türkiyə Müdafiə Nazirliyinin sözçüsü Zeki Aktürk Ankaranın bu addımı Rodosun demilitarizasiya edilmiş statusunun pozulması kimi qiymətləndirdiyini bildirib.
Aktürk qeyd edib ki, Yunanıstanın Rodosda PUA bazası yerləşdirmək istiqamətində atacağı addımlar iki ölkə arasındakı münasibətlərə mənfi təsir göstərə bilər.
Türkiyə tərəfinin mövqeyinə görə, Afinanın bu planı Egey dənizində mövcud həssaslığı daha da artıracaq. Zeki Aktürk Yunanıstanın belə addımlarının mehriban qonşuluq münasibətlərinə, eləcə də bölgədə sülh və sabitliyə zərər vuracağını vurğulayıb.
Ankara uzun müddətdir Egey dənizindəki demilitarizasiya statusuna malik adaların hərbiləşdirilməsinə etiraz edir.
