Almaniyanın nüfuzlu “Bild” nəşrinin yaydığı məlumata görə, Rusiya 2025-ci ildə enerji və xammal ixracından ümumilikdə 233 milyard avro gəlir əldə edəcək. Bu məbləğin azı 20 milyardı Avropa İttifaqı (Aİ) ölkələrinin payına düşür. Maraqlıdır ki, bu göstərici Aİ-nin Ukraynaya ayırdığı hərbi yardımı üstələyir. Yəni Avropa bir tərəfdən Ukraynanı silahla təmin edir, digər tərəfdən isə Rusiyaya milyardlarla avro ödəyərək, müharibə aparmaq imkanlarını gücləndirir.

Aİ-nin mövcud siyasəti nə dərəcədə səmimidir və bu ikili yanaşma müharibənin sonrakı mərhələsində hansı nəticələrə yol aça bilər?

Globalinfo.az-a açıqlamasında politoloq Məhəmməd Əsədullazadə deyib ki, Avropa İttifaqı Rusiyaya qarşı sanksiyalarda, sərt siyasətdə səmimi deyil:

“İttifaq hələ də dolayı yollarla Rusiyadan xammal və təbii qaz idxalını davam etdirir. Rəsmi statistika və iqtisadi göstəricilər sübut edir ki, Aİ Rusiyaya hələ də milyardlarla dollar vəsait ötürür. Bu vəsaitlər Rusiyanın hərbi arsenalını gücləndirmək və müharibəni davam etdirmək üçün istifadə olunur. Bu isə Aİ-nin Ukraynaya göstərdiyi dəstək siyasəti ilə tam ziddiyyət təşkil edir və Rusiya üçün faktiki yardım kimi dəyərləndirilə bilər”.

mehemmed esedullazadeee
Məhəmməd Əsədullazadə

M.Əsədullazadənin sözlərinə görə, Rusiya Ukraynada qələbə qazanarsa, bu, Avropa İttifaqının təhlükəsizlik sistemini ciddi şəkildə sarsıdacaq və qitəni uzunmüddətli hərbi-siyasi təhdidlərə məruz qoyacaq:

“Bu gün Aİ faktiki olaraq Rusiya ordusunun silahlanmasında dolayı iştirak edir. Digər tərəfdən, həm Aİ, həm də ABŞ bir sıra ölkələri Rusiya ilə əməkdaşlığa görə sanksiyalarla hədələyir, halbuki eyni əməkdaşlığı özləri davam etdirirlər. Bu, açıq-aşkar ikili standartdır və beynəlxalq münasibətlər sistemində qeyri-səmimiliyin nümunəsidir. Əgər Avropa İttifaqı həqiqətən də Kremlin siyasətinə qarşı ciddi mövqe ortaya qoymaq istəyirsə, ilk növbədə öz enerji asılılığını minimuma endirməli və Rusiya ilə iqtisadi əməkdaşlığı tamamilə dayandırmalıdır. Yalnız bundan sonra digər ölkələrdən də analoji addım atmalarını tələb edə bilər. Hazırda Aİ-nin sözügedən prosesə başlayacağı inandırıcı görünmür. Rusiya isə mövcud vəziyyətdən tam razıdır və bu ikili yanaşmadan maksimum faydalanır.

Avropa İttifaqının Rusiya ilə iqtisadi münasibətlərdə davamlılığı, sanksiya siyasətinin effektivliyinə və Ukraynaya real dəstəyin nəticələrinə kölgə salır”.