Paytaxtın Nəsimi rayonu, Dilarə Əliyeva küçəsi: 225 a ünvanında yaşayan sakinlər binalarının həyətində yol salınmasından narazıdırlar. Bununla bağlı sakinlər “Qafqazinfo”ya müraciət ediblər.

“Nəsimi 12 MMC”nin sədri Nurxan İsayev bildirib ki, binanın həyətindən Fikrət Əmirov küçəsinin başlanğıcı kimi yol açmaq planlanır: “Bu bina 2013-cü ildə dövlət aktıyla təhvil verilib. Binada 128 mənzil sahibi, 15 mülkiyyətçi var. Buranı sakinlər əvvəldən belə gördüyü üçün mənzil alıblar. İndi isə yol açmaq istəyirlər. Gələn adamlara başa saldım ki, bu yol açılarsa intensiv olaraq gediş-gəlişli olacaq. Çünki Dilarə ƏIiyeya küçəsi həmişə tıxaclı olur. Bizim binanın həyətinə başqa giriş-çıxışımız yoxdur. Onlara dedim ki, sakinlərə alternativ yol təklif etsinlər. Bura Bakı Şəhər İcra Hakimiyyətinin nümayəndəsi Zülfüqar Hüseynzadə, Nəsimi rayon İcra Hakimiyyətinin birinci müavini, qurumun yol departamentinin şöbə müdiri və başqaları gəlmişdilər. Əllərində hər cür avadanlıqla buranı sökmək istəyirdilər. Hələlik qoymamışıq. Ancaq bu məsələ kökündən həll olunmalıdır”.

“Qafqazinfo” məsələ ilə bağlı Bakı Şəhər İcra Hakimiyyətinin mətbuat xidmətinin rəhbəri İsrafil Kərimovla əlaqə saxlayıb. O bildirib ki, sözügedən ünvandakı bina mənzil tikinti korporatividir: “Bina istifadəyə veriləndən sonra müəyyən vaxt ərzində binanın rəhbərliyi, orada yaşayan sakinlər tərəfindən həmin binaya aid olmayan ərazi zəbt olunub və sakinlər üçün maşın dayanacağı, həyət yaradılıb.

Bakı şəhərində tıxacların aradan qaldırılması, qeyri-qanuni zəbt edilmiş torpaq sahələrinin boşaldılması ilə əlaqədar müvafiq işlər həyata keçirilir. Bununla əlaqədar Dövlət Yol Polisi, Azərbaycan Avtomobil Yolları Dövlət Agentliyi, Bakı Nəqliyyat Agentliyi və Bakı Şəhər İcra Hakimiyyəti tərəfindən aparılan araşdırmalar nəticəsində məlum olub ki, şəhərin mərkəzində 10-a yaxın yerdə tikinti korporativləri, ayrı-ayrı şəxslər tərəfindən zəbt olunmuş sahələr var. Həmçinin bu binada da vaxtilə zəbt olunmuş ərazi təmizlənir. Binanın rəhbərliyi həmin ərazini zəbt edib. Ona görə də həmin şəxslər cinayət məsuliyyətinə cəlb olunmalıdır. Çünki bu hala göz yumublar. Hər bir binanı layihələndirən zaman elə edilməlidir ki, orada sakinlər üçün maşın dayanacağı yaradılsın. Bu, onlara əsas vermir ki, dövlət torpağını zəbt edərək dayanacaq yaratsınlar.

Ərazidə yol çəkiləcək ki, nəqliyyat sıxlığı azaldılsın. Həmçinin hərəkətin təhlükəsizliyi təmin olunacaq. Ora işıqfor qoyulacaq, piyadalar üçün keçid düzəldiləcək”.

“Qafqazinfo” sözügedən ərazidən hazırladığı videosüjeti təqdim edir:

Günel Türksoy

Foto+Video: Pərvin Zeynal