Ukrayna eyni vaxtda iki yerli ballistik raket üzərində işləyir. Onlardan birinin mənzili 300, digərinin isə 850 kilometrə çatacaq. İkinci raketin Moskvaya qədər uça biləcəyi bildirilir.

Xarici mediaya istinadən xəbər verir ki, söhbət Ukraynanın “Fire Point” şirkətinin hazırladığı FP-7 və FP-9 ballistik raketlərindən gedir.

Bundan əvvəl Ukraynanın ötən həftəsonu Moskva və Moskva vilayətinə hücum zamanı yeni ballistik raketdən istifadə etdiyi barədə məlumatlar yayılmışdı. Buna səbəb Volodimir Zelenskinin əməliyyatda istifadə olunan silahlar arasında “Pelican” adını çəkməsi olmuşdu. Bəzi Rusiya və Qərb mediası bunu “Fire Point” şirkətinin FP-7 ballistik raketi ilə əlaqələndirmişdi.

Lakin “RBK-Ukrayna”nın mənbələri bildiriblər ki, hücum zamanı ballistik raketdən istifadə edilməyib. Zelenskinin qeyd etdiyi “Pelican” eyniadlı pilotsuz uçuş aparatı olub.

Bununla belə, Ukraynanın öz ballistik raketlərinin hazırlanması artıq xeyli irəliləyib.

“Fire Point” şirkətinin texniki direktoru İrina Terexin sözlərinə görə, FP-7 artıq sınaqların iki mərhələsindən keçib və yaxın həftələrdə döyüş şəraitində buraxılışı gözlənilir. Raketin hesablanmış uçuş məsafəsi 300 kilometrdir və göstəricilərinə görə ABŞ istehsalı ATACMS-a yaxın olduğu bildirilir.

Daha böyük maraq isə ikinci raketə – FP-9-a yönəlib.

Hazırda uçuş sınaqlarından keçirilən FP-9-un mənzilinin 850 kilometr olacağı bildirilir. Bu isə raketə Rusiya paytaxtındakı hədəflərə çatmaq imkanı verə bilər.

Şirkət nümayəndələrinin sözlərinə görə, raketin böyük uçuş məsafəsi onun Ukrayna ərazisində tammiqyaslı sınağını çətinləşdirir. Buna görə növbəti sınaq mərhələsinin faktiki olaraq Rusiya ərazisindəki hədəfə qarşı ilk döyüş tətbiqi ilə üst-üstə düşə biləcəyi bildirilir.

“Fire Point”ın baş konstruktoru Denis Ştilerman bundan əvvəl FP-9-un Moskva istiqamətində ilk döyüş tətbiqinin 2026-cı ilin payızında mümkün olduğunu açıqlamışdı.

Ukraynalı hərbi şərhçi Aleksandr Kovalenko isə ballistik raketlərin pilotsuz uçuş aparatlarından xeyli güclü döyüş başlığı daşıdığını və möhkəmləndirilmiş obyektləri vurmaq imkanına malik olduğunu bildirib.

Onun sözlərinə görə, belə raketlərin qarşısını almaq dronlarla müqayisədə daha çətindir. Rusiyanın ballistik raketlərlə mübarizə apara bilən hava hücumundan müdafiə sistemləri olsa da, ekspert bütün raketlərin vurulacağına zəmanət olmadığını qeyd edib.

Beləliklə, ötən həftəsonu Moskva istiqamətində Ukrayna ballistikasından istifadə edilməsi barədə xəbərlər təsdiqlənməsə də, 850 kilometr mənzilli FP-9 layihəsi planlaşdırıldığı kimi irəliləyərsə, vəziyyət artıq bu payız dəyişə bilər.