Qlobal avtomobil sənayesi tarixinin ən kəskin və ağrılı transformasiya dövrlərindən birini yaşayır.

Elektrikli nəqliyyat vasitələrinə (EV) sürətli keçid, Çin istehsalçılarının aqressiv qiymət siyasəti və qlobal inflyasiya ənənəvi avto-nəhəngləri ciddi iflas riskilə üz-üzə qoyub.

Mütəxəssislər xəbərdarlıq edir ki, yaxın 5 ildə bazarda radikal təmizlənmə gedəcək və alıcı marağının itməsi səbəbindən bir neçə məşhur brend tarixin arxivinə qovuşacaq.

Təhlillərə görə, ilk növbədə köhnəlmiş texnologiyadan əl çəkə bilməyən və elektrik motorlarına keçiddə gecikən benzin/dizel avtomobilləri alıcısını tamamilə itirir. Çinin "BYD", "Geely" kimi brendlərinin ucuz və proqram təminatı ilə zəngin modifikasiyalar təklif etməsi, avropalı və amerikalı istehsalçıların rəqabət qabiliyyətini kəskin zəiflədib. Eyni zamanda, proqram təminatı zəif olan, tez-tez elektron nasazlıqlar yaradan və ikinci əl bazarında dəyərini sürətlə itirən elektrikli modellərə də tələbat sıfıra enir.

Ekspertlərin proqnozlarına görə, növbətı 5 ildə iflas təhlükəsi ilə üz-üzə qalan və ya bazardan çəkilməsi gözlənilən markalar bunlardır:

Stellantis qrupunun zəif halqaları ("Chrysler", "Alfa Romeo", "Maserati", "Lancia"): İllərdir satış həcmi kəskin düşən "Chrysler" və ekskluzivliyini itirən "Maserati" kimi brendlərin konsern daxilində saxlanılması iqtisadi baxımdan səmərəsiz hesab olunur.

"Jaguar": Tamamilə lüks elektrik avtomobillərinə keçid strategiyası seçən britaniyalı istehsalçı keçid dövründə böyük maliyyə itkiləri ilə üzləşir və rəqabətə tab gətirməkdə zorlanır.

Yeni nəsil Çin startup brendləri ("Nio", "Xpeng", "HiPhi" kimi kiçik istehsalçılar): Çində yüzlərlə elektrik avtomobili markasının daxili qiymət müharibəsi aparması səbəbindən onların böyük əksəriyyəti növbəti 3-5 ildə ya müflis olacaq, ya da iri konsernlər tərəfindən udulacaq.

"Nissan" və "Mitsubishi" aliansının bəzi modifikasiyaları: Yenidənqurma prosesi keçirən və milyardlarla dollar zərər açıqlayan yapon istehsalçıları rentabelli olmayan modellərini təcili şəkildə istehsaldan çıxarır.