Avropa İttifaqı Rusiyanın tətbiq etdiyi ticarət məhdudiyyətlərindən sonra Ermənistan iqtisadiyyatına dəstək məqsədilə erməni məhsulları üçün müvəqqəti ticarət güzəştlərinin tətbiqini dəstəkləyib.

Qərar Ermənistanın Avropa İttifaqına ixrac etdiyi məhsulların təxminən 80 faizini əhatə edəcək.

Aİ Şurasına sədrlik edən İrlandiyanın xarici işlər və ticarət naziri Helen Makenti bildirib ki, Avropa Ermənistanın seçdiyi islahatlar və Avropa İttifaqı ilə daha sıx əməkdaşlıq kursunu dəstəkləyir.

“Avropa Ermənistanın və onun xalqının yanındadır. Onlar islahatlar və Avropa İttifaqı ilə daha sıx əməkdaşlıq istiqamətində aydın yol seçiblər. Biz yeni imkanlar yaradacaq və tərəfdaşlarımızın yanında olacağıq”, – deyə Makenti bildirib.

Qərara əsasən, geniş çeşiddə Ermənistan məhsullarının Aİ-yə idxalına tətbiq edilən gömrük rüsumları müvəqqəti olaraq dayandırılacaq. Buraya müəyyən kənd təsərrüfatı məhsulları da daxildir.

Güzəştlər müvafiq qayda qüvvəyə mindikdən sonra iki il müddətində tətbiq olunacaq.

Aİ Şurasının məlumatına görə, tədbirlər Ermənistanın hazırda Rusiyaya ixrac etdiyi təzə meyvə, tərəvəz və bitkilərin təxminən 99 faizini, həmçinin alkoqolsuz və spirtli içkilər ixracının 91 faizindən çoxunu əhatə edən məhsul kateqoriyalarına şamil ediləcək.

Bununla yanaşı, güzəştlər müəyyən şərtlərlə tətbiq olunacaq. Ermənistan məhsulların mənşə qaydalarına əməl etməli, Aİ ilə inzibati əməkdaşlığı davam etdirməli, Avropa İttifaqından idxala qarşı yeni ticarət məhdudiyyətləri tətbiq etməməli və Aİ-Ermənistan Hərtərəfli və Genişləndirilmiş Tərəfdaşlıq Sazişinin əsas prinsiplərinə riayət etməlidir.

Eyni zamanda, Ermənistan məhsullarının idxalı Aİ istehsalçılarına mənfi təsir göstərərsə, Avropa bazarını qorumaq üçün xüsusi müdafiə mexanizmlərinin tətbiqi nəzərdə tutulur.

Aİ bu addımın Rusiyanın son ticarət məhdudiyyətləri nəticəsində Ermənistanın ixracı və tranzit marşrutlarında yaranmış problemlərin təsirini azaltmağa hesablandığını bildirir.

Avropa Parlamentinin sentyabr plenar sessiyasında təklifi dəyişiklik etmədən dəstəkləyəcəyi gözlənilir. Bundan sonra Şura sənədi rəsmən təsdiqləyəcək və qayda Aİ-nin Rəsmi Jurnalında dərc edildikdən sonrakı gün qüvvəyə minəcək.musavat.com