İsrailin Baş naziri Benyamin Netanyahu Qəzza zolağında HƏMAS-ın Daxili Təhlükəsizlik Aparatının rəhbərinin İsrail hərbçiləri tərəfindən ələ keçirildiyini təsdiqləyib.

Bu barədə Baş nazirin dəftərxanası məlumat yayıb.

"Ümumi Təhlükəsizlik Xidmətini və İsrail Müdafiə Qüvvələrini bu gün göstərdikləri cəsarətli addımlara, HƏMAS-ın Daxili Təhlükəsizlik Aparatının rəhbərinin Qəzzada evinin yaxınlığında saxlanılması ilə nəticələnən əməliyyata görə təbrik edirəm", - deyə Netanyahu bildirib.

Baş nazirin sözlərinə görə, adı açıqlanmayan şəxs HƏMAS-ın ən yüksək vəzifəli liderlərindən biridir. O, 2023-cü il oktyabrın 7-də qaçırılan İsrail girovlarının anklav ərazisində saxlanılmasında və daşınmasında birbaşa iştirak edib. Netanyahunun bəyanatında saxlanılan şəxsin son vaxtlar HƏMAS-ın Qəzzada hakimiyyətini bərpa etmək cəhdlərində yer aldığı və regionun silahsızlaşdırılması üzrə razılaşmalara mane olduğu vurğulanıb.

Bu arada, İsrail Müdafiə Qüvvələrinin sözçüsü əməliyyatın Qəzzada İsrail Hərbi Hava Qüvvələrinin hava dəstəyi ilə İsrail Baş Təhlükəsizlik Xidmətinin xüsusi təyinatlıları tərəfindən həyata keçirildiyini bildirib. İsrail Müdafiə Qüvvələrinin verdiyi məlumata görə, saxlanılan şəxs İsrailə aparılıb və dindirilmək üçün təhlükəsizlik qüvvələrinə təhvil verilib.