Rusiyada biznesdən müharibə xərclərini qarşılamaq üçün büdcəyə “könüllü” ödənişlər rekord həddə çatıb.

Ödənişlərin məbləğinə dair məlumatı “Vedomosti” qəzeti Elektron Büdcənin məlumatlarına istinadən yayıb.

Bildirilir ki, 2026-cı ilin əvvəlindən bəri qeyri-hökumət təşkilatlarından Rusiya federal büdcəsinə “təmənnasız” daxilolmalar avqustun ortalarına qədər 383,69 milyard rubla çatıb ki, bu da bütün 2025-ci il ərzində bu cür daxilolmaların həcmindən 1,5 dəfə çoxdur. Nəşrin məlumatına görə, 2026-cı ilin ilk 7,5 ayı ərzində təmənnasız daxilolmaların həcmi də 2025-ci ilin avqust ayının əvvəlindəki 173,4 milyard rubl göstəricisindən təxminən 2,5 dəfə çox olub.

Əvvəlki illərdə bu cür daxilolmaların əhəmiyyətli bir hissəsi xarici şirkətlərin Rusiya aktivlərindən çıxması ilə bağlı ödənişlərdən ibarət idi. 2026-cı ildə isə vəsaitin əhəmiyyətli bir hissəsi Rusiya iş adamlarının “könüllü” ianələrindən əldə edilə bilər: onların ediləcəyini biznes nümayəndələri yazda açıqlamışdılar.

Maliyyə Nazirliyinin məlumatına görə, qeyri-hökumət təşkilatları yanvar-mart ayları arasında federal büdcəyə 15,6 milyard rubl köçürüblər. Bu rəqəm Ukrayna hücumlarından sonra Rusiyanın neft ixracının kəskin azaldığı apreldə 159,7 milyard rubla, mayda 232,3 milyard rubla və iyunda 294,4 milyard rubla yüksəlib. İyul və avqustun bir hissəsində bu rəqəm təxminən 30 faiz artaraq 383,69 milyard rubla çatıb.

Bu il biznesdən “əvəzsiz” daxilolmaların həcmi əvvəlki illərdə toplanan birdəfəlik müharibə vergisini də üstələyib. Federal büdcə bu vergidən cəmi 318,8 milyard rubl əldə etmişdi.