Yəmənin Cənub Keçid Şurası (STC) Konstitusiya Bəyannaməsi qəbul edib.

Musavat.com xarici agentliklərə istinadən xəbər verir ki, sənədə əsasən, gələcək Cənubi Ərəbistan Dövləti 1967-ci ildən 1990-cı ilə qədər mövcud olan Yəmən Xalq Demokratik Respublikasının sərhədləri daxilində yaradılacaq: "Cənubi Ərəbistan Dövləti, paytaxtı Ədən olan keçmiş Yəmən Xalq Demokratik Respublikasının beynəlxalq səviyyədə tanınmış sərhədləri daxilində müstəqil suveren bir dövlətdir. O, ərəb və İslam ümmətinin bir hissəsidir, dili ərəb, dini İslamdır və İslam şəriəti qanunvericiliyin əsas mənbəyidir".

Sənədə əsasən, gələcək dövlətin siyasi sistemi "hakimiyyət bölgüsü", "qanunun aliliyi" və "vətəndaş demokratiyası" prinsiplərinə əsaslanacaq. Vətəndaşlar keçid dövrünün sonunda ümumi referendumda son idarəetmə formasını müəyyən edəcəklər. Bu mərhələ iki il davam edəcək və birdəfəlik uzadılma imkanı olacaq. Bu dövrdə tam icra hakimiyyəti dövlət başçısının əlində cəmləşəcək. Ona baş komandan statusu veriləcək, keçid hökumətinə rəhbərlik edəcək, yüksək vəzifəli şəxsləri və diplomatları təyin edəcək, həmçinin fövqəladə vəziyyət elan etmək və qanun qüvvəsi ilə fərmanlar vermək səlahiyyəti veriləcək.

Qanunvericilik funksiyaları Keçid Qanunvericilik Şurasından (171 deputat) və Senatdan (101 üzv) ibarət iki palatalı orqana həvalə ediləcək. Sənədə əsasən, xüsusi yaradılmış komitə altı ay ərzində milli referenduma təqdim ediləcək daimi konstitusiya layihəsi hazırlamalıdır. Konstitusiyanın qəbulundan sonra ümumi parlament seçkiləri altı aydan çox olmayaraq keçiriləcək. Seçilmiş parlament öz növbəsində ölkə prezidentini 90 gün ərzində seçəcək. Seçilmiş dövlət başçısının andiçmə mərasimi keçid dövrünün rəsmi olaraq başa çatmasını qeyd edəcək.

Qeyd edək bundan əvvəl STC iki illik keçid dövrünün başlanğıcını elan edib. Bu dövrdən sonra müstəqil dövlət elan etməyi planlaşdırır. Şuranın rəhbərliyi beynəlxalq ictimaiyyəti gələcək əməkdaşlığı müzakirə etmək üçün "Cənub və Şimaldakı maraqlı tərəflər arasında dialoqa sponsorluq etməyə" çağırıb. Konstitusiya bəyannaməsinin 2 yanvar 2028-ci ildə qüvvəyə minməsi planlaşdırılır, lakin STC-nin bəyanatında aydınlaşdırılıb ki, separatçıların nəzarətində olan ərazilər və ya onların qüvvələri hər hansı bir hücuma məruz qalarsa, sənəd həmin tarixə qədər qüvvədə hesab edilə bilər.

Yəməndəki vəziyyət BƏƏ-nin dəstəklədiyi Cənub Keçid Şurasının qüvvələri dekabrın əvvəlində Yəmənin şərqindəki Hadramaut və Mahra əyalətləri üzərində nəzarəti ələ keçirdikdən sonra gərginləşib. STC sədri Aydarus əl-Zubeydi növbəti mərhələnin Yəmənin cənubunda gələcək dövlət qurumlarının yaradılmasının planlaşdırıldığını bildirib. 27 dekabrda Yəmənin Prezident İdarəetmə Şurasının rəhbəri Rəşad Məhəmməd əl-Alimi Səudiyyə Ərəbistanının rəhbərlik etdiyi koalisiyadan hərbi yardım istəyib. Daha sonra o, BƏƏ ilə birgə müdafiə müqaviləsini ləğv edən və Əmirlik qüvvələrinin 24 saat ərzində Yəməndən çıxarılmasını tələb edən fərman imzalayıb. Öz növbəsində, Səudiyyə Ərəbistanı Xarici İşlər Nazirliyi BƏƏ-ni şərqi Yəməndəki üsyanı dəstəkləməkdə günahlandırıb və bunu milli təhlükəsizliyinə təhdid adlandırıb. Bunun ardınca BƏƏ Müdafiə Nazirliyi respublikada antiterror missiyaları həyata keçirən məhdud kontingentinin azaldıldığını elan edib.

Yanvarın 2-də Hadramaut qubernatoru Salem əl-Xanbaşi Cənub Keçid Şurası tərəfindən idarə olunan hərbi düşərgələrin hökumət qüvvələrinə təhvil verilməsi üçün əməliyyatın başladığını elan edib. Onun sözlərinə görə, Vətən Qalxanı bölmələri əyalətin qərbindəki Əl-Həşa rayonunda əsas qala olan 37-ci Briqada düşərgəsini geri alıb, separatçı qüvvələri sıxışdırıb və Seyyun şəhərinə doğru irəliləməyə başlayıb. Medianın məlumatına görə, hökumət qüvvələri Səudiyyə Ərəbistanının hava qüvvələrinin himayəsində irəliləyir.