“Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev bildirdi ki, Bakı üçün müharibə başa çatıb”.

“Sputnik Ermənistan” xəbər verir ki, bunu Ermənistan vətəndaş cəmiyyəti nümayəndələrindən ibarət qrupun üzvü Areq Koçinyan Bakı səfərinə həsr olunmuş mətbuat konfransında çıxışı zamanı söyləyib.

“Hikmət Hacıyev Ermənistan cəmiyyətinə bir neçə mesaj çatdırmağımızı xahiş etdi. Bakı üçün münaqişə başa çatıb, azərbaycanlılar indiki “qeyri-müharibə” vəziyyətindən sülhə keçmək, Ermənistanla hərtərəfli və uzunmüddətli sülh qurmaq istəyirlər”, - Koçinyan Hikmət Hacıyevlə görüşün detalları barədə danışarkən deyib.

Onun sözlərinə görə, Hacıyev, həmçinin Azərbaycanın Ermənistana qarşı heç bir ərazi iddiasının olmadığını bir daha diqqətə çatdırıb.

Xatırladaq ki, 21-22 noyabr 2025-ci il tarixlərində “Sülh Körpüsü” Təşəbbüsü çərçivəsində Ermənistan vətəndaş cəmiyyəti nümayəndələrindən ibarət qrupun Azərbaycana səfəri baş tutub. Səfər zamanı “Sülh Körpüsü” Təşəbbüsü üzvləri Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev ilə görüşüblər.