"Misirdə, Yaxın Şərqdə sülhün əldə olunması niyyəti ilə liderlərin iştirakı xüsusunda Sülh Sammiti keçiriləcək və Qəzza zolağında davam edən üzücü müharibəyə son qoymaq, saxlanılan şəxslərin mübadiləsini həyata keçirmək əsas hədəf olacaqdır. Tədbiri bizim üçün əlamətdar edən həm də cənab Prezident İlham Əliyevin Sülh Sammitində iştirakıdır".

Bu sözləri açıqlamasında politoloq İlyas Hüseynov Misirdə keçirilən Yaxın Şərq Sülh Sammitini şərh edərkən deyib.

Onun sözlərinə görə, təkcə oktyabr ayı ərzində Prezidentin səfərlərini təhlil etsək, deyə bilərik ki, Azərbaycan artıq qlobal məsələlərin həll olunduğu platformalarda yaxından iştirak edir.

"Məsələn, Avropa Siyasi Birliyinin Kopenhagendə keçirilən toplantısı, ardınca Qəbələdə Türk Dövlətləri Təşkilatının mühüm Zirvə Görüşü, Tacikistanın paytaxtı Düşənbədə MDB Dövlət Başçıları Şurasının sammiti, ardınca Misirdə Yaxın Şərq tematikası üzrə Sülh Sammitində cənab Prezidentin iştirakı Azərbaycanın qlobal nüfuzundan xəbər verir. Azərbaycan artıq yavaş-yavaş Yaxın Şərq siyasətində də fəal rol oynamağa çalışır. Suriyada vətəndaş müharibəsi bitdikdən sonra oraya ilk humanitar yardım göndərən dövlətlərdən biri də Azərbaycan olub. Azərbaycan həm də Türkiyə-İsrail danışıqlarında vasitəçi kimi çıxış edir və bununla da Yaxın Şərq mövzusu ilə yaxından maraqlandığını ifadə edir.

Azərbaycan Suriyaya həm də təbii qazın nəqli ilə məşğuldur. Yəni Yaxın Şərq istiqamətində siyasi gündəlik çox genişdir və Azərbaycan sülhün, ədalətin, bərabərliyin, BMT nizamnaməsindən irəli gələn müddəaların, beynəlxalq hüququn fundamental norma və prinsiplərinin qorunmasının ardıcıl təşəbbüskarı və bu istiqamətdə fəal siyasət yürüdən dövlətlərdən biridir".