Pakistan İslam Respublikasının baş nazirinin müavini, xarici işlər naziri Məhəmməd İshaq Dar və Ermənistan Respublikasının xarici işlər naziri Ararat Mirzoyan iki ölkə arasında diplomatik əlaqələrin qurulmasına dair birgə bəyannamə imzalayıblar.

Bu barədə Ermənistan XİN-in mətbuat xidməti məlumat yayıb.

İmzalanma mərasimi Çinin Tiancin şəhərində keçirilən ŞƏT sammiti çərçivəsində baş tutub.

Bəyannaməni imzalamaqla Ermənistan və Pakistan diplomatik əlaqələr qurur. Hər iki ölkənin hökumətləri suverenliyə və ərazi bütövlüyünə qarşılıqlı hörmət, təcavüz etməmək, bir-birinin daxili işlərinə qarışmamaq, bərabərlik, qarşılıqlı fayda və dinc yanaşı yaşamaq prinsipləri daxil olmaqla, BMT Nizamnaməsinə uyğun olaraq dostluq münasibətlərini inkişaf etdirməyə çalışırlar.

Ermənistan və Pakistan hökumətləri 1961-ci il Diplomatik Münasibətlər haqqında Vyana Konvensiyasına və ənənəvi beynəlxalq təcrübəyə uyğun olaraq qarşılıqlı əsasda diplomatik münasibətlərin aparılması üçün nümayəndələr mübadiləsi və bir-birlərinə bütün lazımi köməklik göstərilməsi barədə razılığa gəliblər.

Pakistanın xarici işlər naziri İshaq Dar sosial şəbəkədə Ermənistanla diplomatik münasibətlərin qurulması ilə bağlı paylaşım edib.

“Mən və Ermənistanın xarici işlər naziri Ararat Mirzoyan Çinin Tiancin şəhərində keçirilən ŞƏT-in 25-ci Zirvə Toplantısı çərçivəsində Pakistan və Ermənistan arasında diplomatik münasibətlərin qurulmasına dair Birgə Bəyannamə imzalamaqdan və mübadilə etməkdən məmnunuq.

Biz BMT Nizamnaməsinin prinsip və məqsədlərinə sadiqliyimizi bir daha təsdiqlədik və iqtisadiyyat, təhsil, mədəniyyət və turizm də daxil olmaqla müxtəlif sahələrdə ikitərəfli əməkdaşlığı daha da gücləndirmək üçün birgə işləmək barədə razılığa gəldik”, - Pakistanın xarici işlər naziri yazıb.