Biləcəri qəsəbəsi Natavan küçəsində yerləşən meşəlik ərazi acınacaqlı vəziyyətdədir.

Milli.Az xəbər verir ki, ərazidəki ağaclara qulluq edilmir, həmişə yaşıl bitkilər çoxu quruyub, yarısı isə aşıb. Bir sözlə illərin ağacları baxımsız vəziyyətdədir.

Məsələ ilə bağlı Biləcəri Bələdiyyəsindən bildirildi ki, ağacların aşması və ya quruması ilə bağlı Bakı Şəhər Yaşıllaşdırma Təsərrüfatı birliyinə və Dövlət Ekoloji Ekspertiza Agentliyinə məlumat verilib. Şəkillər və video-çəkiliş də təqdim olunub.

Sözügedən problemlə bağlı isə Dövlət Ekoloji Ekspertiza Agentliyi deyilənləri təkzib etdi:

"Həmin ərazidə yaşıllıqların quruması səbəbindən götürülməsinə rəy verilməsi ilə bağlı agentliyə hər hansı müraciət daxil olmayıb. Müraciət daxil edildityi təqdirdə ekspertlərimiz tərəfindən yaşıllıqlara baxış keçiriləcək, müvafiq rəy verilməsi məsələsinə baxılacaq".

Bakı Şəhər Yaşıllaşdırma Təsərrüfatından isə bildirildi ki, ərazidə külək nəticəsində aşan ağaclar götürülür. Lakin aşmayan ağacların götürülməsi üçün dövlət qurumu tərəfindən verilən rəy lazımdır. Rəy olmadan həmin ağacların kəsilməsi mümkün deyil.