“Zülfəli İsmayılov dedi ki, içəridə ola-ola evini sökəcəm, səni də içində öldürəcəm”

Bakının Yasamal rayonunda baş verən qalmaqallı söküntüdən sonra paytaxtın mərkəzində daha bir mənzil qanunsuz olaraq dağıdılıb. Söhbət Xətai rayonu, Sergey Senyuşkin 34 ünvanında yerləşən mənzilin sahibindən icazəsi sökülməsindən gedir. Ev sahibi deyir ki, xəbəri olmadan ona məxsus qeyri-yaşayış sahəsi bir neçə saatın içində elə dağıdılıb k, daş daş üstündə qalmayıb, hətta içindəki əşyalar da bütünlüklə yoxa çıxıb.

Bu haqda “Hürriyyət” qəzetinə müraciət edən Bakı sakini, hazırda Bakı şəhəri, Xətai rayonu, M.Hadi küçəsi, ev 41, mənzil 3-də kirayədə yaşayan Musayeva Gülgəz Yunis qızı deyir ki, sözügedən mənzil qızı Xuraman Nağıyevaya məxsus olub. Onun sözlərinə görə, qanuni şəkildə qeyri-yaşayış sahəsi kimi istifadə olunan mənzili birbaşa Bakı Şəhər İcra Hakimiyyətinin Nəzarət-təftiş şöbəsinin müdiri Zülfəli İsmayılov göstərişi ilə yerlə-yeksan edilib. G.Musyaveva başına gələnləri əməkdaşımıza danışıb:

“Qeyd edim ki, 2018-ci ildə Xətai rayonu, Sergey Senyuşkin 34 ünvanında olan 1 otaqlı 24.08 kv olan həyət evini qızıma almışdım. Sonradan maddi vəziyyətim çətin olduğuna görə, həmin evi obyektlə əvəzləyib, özüm kirayədə yaşamışam.

Bu yaxınlarda həmin ünvanda söküntü işləri aparılıb. Bundan əvvəl Bakı Şəhər İcra Hakimiyyətinin Nəzarət-təftiş şöbəsinin müdiri Zülfəli İsmayılov məni çağırıb bildirdi ki, ərazidə söküntü olacaq, mənzillərin hər kv.metrinə 2700 manatdan ödəniş ediləcək. Mən buna razılıq vermədim. Çünki həmin ərazidəki fərdi yaşayış evlərinə də həmin məbləğ təklif olunmuşdu. Mənim evim isə qeyri-yaşayış sahəsi kimi sənədləşdirilib və sökülən tarixədək qanuni şəkildə icarədə idi.

Mən təklif olunan məbləğlə razılaşmadığım üçün Zülfəli İsmayılov dedi ki, “sən razı olsan da, olmasan da mən həmin ünvanı uçurdacam. Heç yerə getmədən, kimsəyə şikayət etmədən razılaş”. Hətta onu da əlavə etdi ki, harasa şikayət etsən, sənə 1 qəpik belə verməyəcəm.

Bu zaman dedim ki, gedib evimdə yaşayacam, içərisində də əşyalarım var. Yenə dedi ki, “sən evdə ola-ola söküb, səni də içində öldürəcəm”.

Ərazidə söküntü başlayandan sonra kirayəyə verdiyim şəxslər çıxdı, ev boş qaldı. Mən arada imkan tapdıqca gedib evimə baxırdım. Təxminən 1 həftə qabaq yenə gedib evimə baş çəkəndə gördüm ki, yerlə-yeksan edilib, evdə daş daş üstündə qalmayıb. Hətta içərisində olan əşyalarım da yox idi. Hansı ki, söküntüdən əvvəl evin içərisində soyuducu, televizor, çarpayı, divan və s. əşyalarım var idi.

İcra Hakimiyyətinin əməkdaşlarında əlaqə telefonlarım olsa da, evim sökülən gün mənə heç bir məlumat verilməyib.

Onu da deyim ki, 2,5 sot torpaq sahəsinin içində tikilən obyektin sahəsi 24.08 kv.metr olsa da, qeyri-yaşayış sahəsi kimi sənədləşdirilndə 22.08 kv.metr hesablamışdılar. Bundan əlavə, həyədə sanitar qovşaq və hamam var idi. Bunları da nəzər almadan, mənə cəmi 22 kvadrat metr üçün pul təklif olunurdu.

Hər kəsə bəllidir ki, həmin ərazidə obyektlərin hər kv.metrinin qiyməti 8-9 min manatdır. Onların verdiyi məbləğə isə mən heç şəhərin kənarında da evə ala bilməzdim. Bu səbəbdən təklif etdim ki, ərazidə obyektimin kvadratına uyğun yeni bir obyekt versinlər. Lakin dedilər ki, ən yaxşı halda hər kvadratına 3000 manat verə bilərik. Mən razılaşmadım və indiyədək heç bir məbləğ də almamışam.

Obyektimin qanunsuz olaraq sökülməsinə, işindəki əşyalarımın yoxa çıxarılmasına rəğmən, mən yenə də artıq heç nə istəmirəm, ya obyektimi alıb versinlər, ya da ərazidəki qiymətlərə uyğun pulumu versinlər”.

Məsələ ilə bağlı Bakı Şəhəri Nəzarət-təftiş şöbəsinin müdiri Zülfəli İsmayılovla əlaqə saxlamağa çalışsaq da, telefon zənglərimizi cavabsız qoydu.

Jalə FAMİLQIZI

Redskiyadan: Yazıda adları qeyd olunan şəxslərin və qurumların mövqeyini dərc etməyə hazırıq.