ABŞ-nin esminesləri, aviadaşıyıcıları və dəniz piyadalarının elit diviziyaları Hörmüz boğazının blokadasını təmin etməyə davam edir.

ABŞ Prezidenti Donald Tramp İrana qarşı mümkün müharibədə iştirak etmək üçün bölgəyə 50 minə yaxın hərbi qulluqçu göndərib.

"The New York Times" qəzetinin yazdığına görə, hazırda Amerika hərbçiləri regionda yüksək döyüş hazırlığı vəziyyətindədir. Ağ Evdən hərbi əməliyyatların statusu ilə bağlı ziddiyyətli siqnallar gəlsə də, Trampın missiyası İranın raket sənayesini məhv etmək məqsədi daşıyır. Dövlət katibi Marko Rubio "Epik qəzəb" əməliyyatının başa çatdığını bildirsə də, müdafiə naziri Pit Heqset əsas diqqətin Hörmüz boğazından gəmilərin təhlükəsiz keçidinə yönəldiyini açıqlayıb. Tramp isə xəbərdarlıq edib ki, əgər Tehran razılaşdırılmış şərtləri qəbul etməsə, bombardmanlar başlayacaq.

Fevral ayında müharibə başlamazdan əvvəl regiondakı bazalarda 40 min hərbçi olduğu halda, gərginliyin artması ilə bu rəqəm 50 mini ötüb. ABŞ Hərbi Dəniz Qüvvələri hazırda İran limanlarına gedən və oradan gələn bütün gəmilərin blokadasını həyata keçirir.

Artıq blokadanı yarmağa çalışan İran bayraqlı bir neft tankeri ABŞ hərbi təyyarəsi tərəfindən sıradan çıxarılıb.

Regiondakı əsas zərbə qüvvələri:

82-ci Hava-Desant Diviziyası: Təxminən 2000 elit desantçı bölgədədir. Onların İranın neft ixracı mərkəzi olan Xarq adasını ələ keçirmək və ya strateji aerodromlara nəzarəti təmin etmək üçün istifadə edilə biləcəyi ehtimal olunur.

31-ci Dəniz Piyada Ekspedisiya Bölməsi: 2500 dəniz piyadası və 2500 dənizçidən ibarət olan bu qüvvə ada əməliyyatları üçün nəzərdə tutulub.

Xüsusi Təyinatlı Qüvvələr: Bir neçə yüz xüsusi təyinatlı mart ayında bölgəyə gəlib. Onların əsas hədəfinin İsfahandakı nüvə obyekti və yüksək dərəcədə zənginləşdirilmiş uran ehtiyatları ola biləcəyi bildirilir.

Aviadaşıyıcı qruplar: "U.S.S. Abraham Lincoln" və "U.S.S. George H.W. Bush" aviadaşıyıcıları 10 mindən çox heyətlə Ərəbistan dənizindədir. Bu gəmilər raket və qırıcı təyyarələrlə İrana birbaşa zərbə endirmək imkanına malikdir.

Eyni zamanda, Donald Trampın Kubanı da "Abraham Lincoln" aviadaşıyıcısı ilə hədələdiyi barədə məlumatlar yayılıb, lakin bunun rəsmi plan və ya fərziyyə olduğu hələlik dəqiqləşməyib.