ABŞ Maliyyə Nazirliyi İrana ABŞ sanksiyalarından yayınmağa kömək edən istənilən maliyyə və kommersiya qurumlarına ikinci dərəcəli sanksiyalar tətbiq edəcək.

Bunu ABŞ dövlət katibi və milli təhlükəsizlik müşaviri Marko Rubio Ağ Evdə keçirilən mətbuat brifinqində deyib:

"Maliyyə Nazirliyi hazırda bu rejimə axan hər bir dollar gəliri müəyyən edir və bloklayır. Buna görə də İrana qarşı sanksiyalardan yayınmağı asanlaşdıran hər hansı bir xarici maliyyə və ya kommersiya qurumu ikinci dərəcəli sanksiyalara məruz qalacaq və ABŞ maliyyə sisteminə çıxışını itirəcək".

Rubio bu mövqenin ABŞ-ın İrana qarşı məhdudlaşdırıcı tədbirləri görməzdən gələn Çin şirkətlərinə qarşı da eyni olduğunu vurğulayıb: "Bizim müəyyən seçimlərimiz var. Əgər Çin sanksiyalarımızı görməzdən gələrsə, onlar ikinci dərəcəli sanksiyalarla üzləşəcəklər. Bu gün bu barədə elan edəcək əlavəm yoxdur, amma biz bunları simvolik məqsədlər üçün etmirik".