“ALLAH Tərəfindən Ucalan Bəndələri İnsan Alçalda Bilməz” – Qağaməli Seyfullayev Barəsində Yazılan Şər və Böhtanlara CAVAB
Son günlər mediada “Neftqaztikinti” trestinin müdiri Qağaməli Seyfullayev barədə yayılan yazılar qərəzli, fakta əsaslanmayan və ictimai rəyi çaşdırmağa yönəlmiş məlumatlardan ibarətdir. Uzun illərdir SOCAR sistemində vicdanla çalışan, yüzlərlə işçinin rifahı, təhlükəsizliyi və layihələrin uğurla icrası üçün məsuliyyət daşıyan bir insanı qaralamaq cəhdi nə etik, nə də hüquq çərçivəsinə sığır. Hamı bilməlidir ki, Allah tərəfindən zəhməti ilə ucalan bəndəni heç bir yalan, qərəz və böhtan alçalda bilməz.
Yayılan yazılar diqqətlə oxunduqda ortada bircə sübutun, bircə sənədin olmadığı açıq görünür. Hər cümlə “deyilir”, “güman olunur”, “etdiyi bildirilir”, “bizə məlumat daxil olub” kimi qeyri müəyyən sözlərlə başlayır. Hüquq normalarında, etik jurnalistikada belə məlumatlar dəlil sayılmır və çoxu sırf şəxsi narazılığın, yaxud uğursuz işə qəbul cəhdlərinin yaratdığı emosional iddialardır. Əgər doğrudan da hansısa qanunsuzluq və ya saxtakarlıq varsa, bunun yeri sosial şəbəkələr və qarayaxma yazılar deyil, hüquq mühafizə orqanlarıdır. Lakin bu istiqamətdə heç bir rəsmi addım atılmayıb – çünki ortada sübut yoxdur, yalnız söz-söhbət var.
Q.Seyfullayevin qohumlarını və yaxınlarını işə qəbul etməsi barədə yayılan iddialar da cəmiyyətə yanlış təqdim olunur. SOCAR sistemində işə qəbul prosesi elektron qeydiyyat, müsabiqə və komissiya qərarları ilə həyata keçirilir. Heç kimin təkbaşına kimisə işə götürmək səlahiyyəti yoxdur. Bir şəxsin qohum olması onu avtomatik olaraq işdən kənarlaşdırmaq üçün əsas deyil. Əgər kadrın təhsili, stajı, imtahan nəticələri və göstəriciləri uyğundursa, onun işə qəbul olması qanunla tam uyğundur. Əks halda qohumluğa görə işdən uzaqlaşdırmaq ayrı-seçkilik və qanun pozuntusudur.
İmtahan və yerdəyişmə proseslərinin “saxtalaşdırılması” barədə deyilənlər də ciddiyə alınmır. Bütün imtahanlar video çəkilişlə qeydə alınır, nəticələr sistemə daxil edilir, komissiya bir neçə şöbədən formalaşır və təsdiq mexanizmi fərdi qərarla yox, sənəd və protokolla icra olunur. Əgər kimsə həqiqətən saxtakarlığı sübut edən sənədlərə malikdirsə, bunu mətbuat yazısıyla deyil, qanuni prosedurla sübut etməlidir. Sübut göstərilmirsə, bu yalnız böhtan xarakteri daşıyır.
Yazıda Ziba xanım Mustafayevanın adının hallandırılması isə ümumiyyətlə etikadan kənardır. SOCAR-da heç kim şəxsi tapşırıqla kadr yerləşdirə bilməz və bu mexanizmlər hamıya məlumdur. Bəzi şəxslərin öz narazılıqlarını ört-basdır etmək üçün yüksək vəzifəli şəxslərin adından istifadə etməsi, kiminsə adından “tapşırıq” deyə yalan uydurması yalnız ucuz informasiya manipulyasiyasıdır. Həmçinin, trestin kadrlar şöbəsində çalışan şəxslərin adbaad hədəf alınması, onların ailələri, əmlakı və şəxsi həyatı ilə bağlı iddialar irəli sürmək jurnalistika deyil – bu, şəxsi linç kampaniyasıdır.
Əsl həqiqət ondan ibarətdir ki, Qağaməli Seyfullayev illərdir dövlətə, SOCAR-a və Azərbaycan enerji sektorunun inkişafına xidmət edir. Trestin fəaliyyətində sabitlik və şəffaflıq təmin olunub, layihələr vaxtında tamamlanır, işçilərin əməkhaqları və təhlükəsizlik məsələləri diqqətdə saxlanılır. Bu uğurları görməyənlər, qəbul etməyənlər, şəxsi maraqları təmin olunmadığı üçün narazı qalanlar çirkli informasiya ilə nüfuzdan salmağa çalışır.
Heç bir böhtan, heç bir saxta iddia, heç bir qərəzli yazı halal zəhmətlə, əməyilə ucalan insanı yıxa bilməz. İnsanı alçaltmaq istəyənlər nə qədər çalışsa da, həqiqət gec-tez üzə çıxır. Allah ədalətlidir və doğrunun yanında olandır. Qaranlıq sözlərlə kimisə gözdən salmaq asandır, amma illərlə qurulan nüfuzu, peşəkar fəaliyyəti və halal əməyin gücünü heç nə silə bilməz.
