Son günlərdə bəzi media orqanlarında və sosial platformalarda Şirvan şəhər icra başçısının müavini Orxan İbrahimov və onun ailə üzvləri haqqında yayılan məlumatlar təəssüf doğuracaq qədər qeyri-peşəkar, qərəzli və böhtan xarakterlidir. Bu cür informasiyalar nəinki jurnalistikanın prinsiplərinə ziddir, həm də ictimai rəyi çaşdırmaq, şəxsi nüfuzu ləkələmək və şəxsi maraqlara xidmət etmək məqsədi daşıyır.

Şirvan şəhərində ağacların guya qanunsuz şəkildə kəsilməsi və bu işin Orxan İbrahimov və onun ailə üzvləri ilə əlaqələndirilməsi tamamilə əsassız, heç bir sübuta və hüquqi fakta əsaslanmayan iddialardır. Jurnalist araşdırması adı altında yayılan məlumatların obyektivlikdən tamamilə uzaq olması və mövqeyin qarşı tərəfdən sorğulanmadan dərc olunması artıq hansısa şəxsi maraqların və qərəzli niyyətlərin göstəricisidir.

İlk olaraq qeyd edilməlidir ki, Şirvan şəhərində yaşıllıqların qorunması, abadlıq və ekoloji tarazlığın saxlanılması məsələləri Orxan İbrahimovun birbaşa nəzarətində olan sahə deyil və şəhər icra hakimiyyəti bu kimi halları ciddi şəkildə nəzarətdə saxlayır. Hər hansısa ağacın kəsilməsi və ya yaşıllığa müdaxilə yalnız müvafiq dövlət orqanlarının icazəsi ilə, qanuni əsaslarla mümkündür. Əgər bu cür hallar baş veribsə, bunun məsuliyyətini daşıyan aidiyyəti strukturlar araşdırma aparır və lazımi tədbirlər görülür.

Orxan İbrahimovun atası Əhmədağa İbrahimovun adı bu cür yazılara cəlb olunaraq, sanki məmur ailəsi olmaq özü-özlüyündə bir günah kimi təqdim edilir. Əhmədağa İbrahimov uzun illər dövlət qurumlarında vicdanla xidmət etmiş, ictimaiyyətə və dövlətə sadiq bir vətəndaşdır. Onun sahibkarlıq fəaliyyəti ilə bağlı yayılan fikirlər isə sadəcə “deyilənlər” səviyyəsindədir – sübut olunmamış, sənədsiz və uydurma iddialardır. Kimin nə qədər əmlakı varsa, bu dövlət orqanlarının nəzarətindədir və qanunsuzluq olarsa, hüquqi addımlar atılmaqdadır. Lakin medianın və bəzi “jurnalistlərin” bu prosesi öz məqsədləri üçün manipulyasiya etməsi cəmiyyət üçün təhlükəli bir tendensiyadır.

Ağacların kəsilməsi məsələsinin guya bir obyektin yoluna düşməsi, ya da hansısa şəxsin maraqları üçün edilməsi barədə yayılan fikirlər emosional təsir bağışlasa da, hüquqi baxımdan heç bir dəyərə malik deyil. Hər bir ağacın kəsilməsi qərarı müvafiq icazə sənədləri əsasında, rəsmi prosedurlarla aparılır. Bu proseslərin icrası isə şəffaf şəkildə tənzimlənir.

Şirvan şəhər icra başçısının müavini olaraq Orxan İbrahimov ictimai maraqları şəxsi maraqlardan üstün tutan, dövlətə və xalqa xidmət edən bir vəzifəli şəxsdir. Onun fəaliyyəti zamanı həmişə qanunlara, etik prinsiplərə və məsuliyyətə söykənmiş addımlar atılıb. Reallıq budur ki, bu gün bəzi dairələr ictimai nüfuzu və nümunəvi fəaliyyəti ilə seçilən şəxsləri hədəf seçərək, onların üzərindən media vasitəsilə təzyiq göstərmək, nüfuzdan salmaq və şəxsi məqsədlərinə çatmaq istəyirlər.

Əgər hansısa media orqanı və ya şəxs həqiqətən ictimai maraqları qorumaq istəyirsə, bunun yeganə yolu peşəkar və obyektiv jurnalistikadır – qərəzli yazılar, emosional ritorika və sübutsuz iddialarla deyil.

Orxan İbrahimov və ailəsinə qarşı aparılan bu informasiya kampaniyası cəmiyyətin diqqətini yayındırmaq və sağlam ictimai münasibətlərə xələl gətirməkdir. Həqiqəti təhrif edərək “qəhrəmanlıq” göstərmək istəyənlər anlamalıdır ki, cəmiyyət artıq uydurmalara yox, rəsmi sənədlərə, şəffaflığa və məsuliyyətli yanaşmaya üstünlük verir.

İndi siz deyin, onu bağışlamaq olarmı? – Əgər günah yalnız uğurlu olmaq, dövlətə və xalqa vicdanla xidmət etməkdirsə, bəli... cəmiyyət belə insanları deyil, onları hədəf seçənləri mühakimə edəcəkdir.