"Microsoft"un qurucusu və dünyanın ən zəngin insanlarından biri olan amerikalı milyarder Bill Qeyts süni intellektin iş dünyasında yaradacağı inqilabla bağlı diqqətçəkən proqnozlar verib.

Qeyts süni intellektin sürətli inkişafının bütün peşələrə əhəmiyyətli dərəcədə təsir etdiyini qeyd edib.

O bildirib ki, avtomobil, səhiyyə, kənd təsərrüfatı, təhsil kimi sektorlarda sürətlə yayılmağa davam edən və həyatımızın əhəmiyyətli bir hissəsinə çevrilən süni intellekt dünyanın bütün tərəflərini dəyişməkdə davam edir.

“Süni intellekt sürətlə inkişaf edir. Bu bacarıqları öyrənənlər iş imkanlarını daha yaxşı qiymətləndirə biləcək”, - Qeyts bildirib.

Milyarder əlavə edib ki, texnologiyanın təqdim etdiyi imkanlar işçi qüvvəsini formalaşdıracaq. "Süni intellekt bəzi qruplar üçün fürsət yaratdığı halda, bəziləri üçün də maneələr yarada biləcək. Odur ki, bu məsələyə diqqətlə yanaşmaq lazımdır. Çünki süni intellekt təkcə iş dünyasında deyil, həm də təhsildə inqilab edəcək. Bu baxımdan təhsil sistemində fərdiləşdirilmiş öyrənmə proseslərini təmin edəcək proqram təminatının təsirinə diqqət yetirmək lazımdır.

Buna görə də uşaqları erkən yaşda proqramlaşdırmağı öyrənməyə həvəsləndirmək və bu bacarığa yiyələnməyi aşılamaq vacibdir", - Qeyts bildirib.