Bir neçə ay əvvəl Tərtər sakini Bağırlı Vəfa Həsən qızının Bakının Fatmayi kəndində yerləşən, işlədiyi cücə sexində mobil telefonunun oğurlanması barədə məlumat vermişdik.

V.Bağırlı Daxili İşlər naziri Ramil Usubova müraciət edərək Mehdiabad polisində Aslan adlı müstəntiqin işi ört-basdır etməsindən şikayətlənmişdi.

Cahan.info-ya məlumat verən V.Bağırlı bildirdi ki, cənab nazirə müraciətindən sonra Abşeron polis rəisinin müavini onu qəbul etmişdi.

Lakin bu günə kimi onun telefonunu oğurlayan şəxs məsuliyyətə cəlb edilməyib və cinayət işinə xitam verilib.

Vəfa Bağırlı bir daha saytımız vasitəsi ilə DİN rəhbəri R.Usubova müraciət edərək işin araşdırılmasını xahiş edib: “Cənab nazir, mən kasıb bir insanam.

Tərtər sakiniyəm, Gorədildə kirayədə yaşayıram. Fatmayi kəndində parniklərdə, cücə sexlərində günəmuzd işləyib min bir zülmlə çörək pulu qazanıram.

Parnikdə işləyib əziyyətlə yığdım puldan özümə mobil telefon alıb sevinmişdim ki, ürəyimdə qoydular. Mənimlə işləyən bir adam telefonumu oğurladı. Oğrunun kimliyi bəllidir.

Ancaq Mehdiabad polisində müstəntiq Aslan isə parnikin sahibi nə danışdısa, işi bağladı. Bir neçə ay qabaq sizə müraciətimdən sonra Abşeronun rəis müavini bizi qəbul elədi, oğrunu göstərdik.

İndi xəbər tuturam ki, işə xitam verib. Niyə? Mən zülmlə pul qazanıb telefon alım, kimsə oğurlasın və cəzasız qalsın.

Mənim cənab nazirə müraciət etməkdə məqsədim polisin işinə kölgə salmaq deyil, sadəcə bəziləri məsuliyyətsizlik, səhlənkarlıq göstərir, oğruya hamilik edirlər”.

V.Bağırlı R.Usubova üz tutaraq yardım göstərilməsini xahiş edir: “Cənab nazir, ümidim sizədir. Mən kasıb, əlinin qabarı ilə çörək pulu qazanan bir qızam. Xahiş edirəm ki, müraciətimə baxılsın, oğru müəyyən edilsin, telefonum qaytarılsın”.

V.Bağırlı nazirliyə əlaqə nömrəsi təqdim edib: (070) 505 – 34-04