Türkiyə Ermənistanla sərhədi bağlı saxlamaqda davam edir.
AZTB.info “İnterfaks” agentliyinə istinadən xəbər verir ki, bu sözləri Ermənistan prezidenti Münhen Təhlükəsizlik Konfransındakı çıxışında deyib.

“Zaman burada, sanki, dayanıb. Əminliklə deyə bilərəm ki, vəziyyəti nizamlamaq məqsədilə Ermənistan əlindən gələni edib. Mənim təşəbbüsümlə başlanmış Ermənistan-Türkiyə münasibətlərinin normallaşdırılması prosesi ölkələrimiz və bölgə üçün yeni imkanlar yarada bilərdi. Lakin, münasibətlərinin normallaşdırılmasına dair Ermənistan-Türkiyə protokolları kağız üzərində qaldı”, - deyə Serj Sarkisyan bildirib.

Sarkisyan vurğulayıb ki, Türkiyə nəinki bu protokolları ratifikasiya etməyib, hətta, sənədlərə heç bir aidiyyəti olmayan ilkin şərtlər irəli sürüb.
“Bu, tarixi fürsətin əldən verilməsindən başqa bir şey deyil”.
“Ermənistan-Türkiyə münasibətlərinin normallaşdırılmasına Azərbaycan mane olurmu? Xeyr. Əsas maneə Türkiyə liderlərində siyasi iradənin olmamasıdır. Biz daim Türkiyədən cavab addımlarının atılmasını gözləyə bilmərik. Protokollar mövcud şəraitə əsaslanaraq imzalanmışdır”, - deyə Sarkisyan bildirib.

O, qeyd edib ki, Türkiyə protokolların ratifikasiyası üçün yeni şəraitin yaranmasını gözləmək niyyətindədirsə, yanılır. Yeni şəraitdə danışıqlar artıq yeni sənəd üzrə aparılmalıdır. Ermənistan ilkin şərtlər irəli sürmür və heç kimdən ilkin şərtləri qəbul etməyəcək.