Rusiya Xarici İşlər Nazirliyinin rəsmi nümayəndəsi Mariya Zaxarovanın Qarabağ və KTMT ilə bağlı son açıqlaması erməni teleqram kanallarında sərt tənqidlə qarşılanıb.

Erməni teleqram kanallarında yayılan paylaşımlarda Zaxarovanın dediklərinin həqiqəti əks etdirmədiyi iddia olunur.

Paylaşım müəlliflərinin fikrincə, Ermənistan Qarabağ münaqişəsi ilə bağlı heç vaxt KTMT-yə müraciət etməyib. Bildirilir ki, İrəvan təşkilata yalnız 2022-ci ildə Azərbaycanın Ermənistanın beynəlxalq səviyyədə tanınmış ərazisinə daxil olduğunu əsas gətirərək kollektiv müdafiə mexanizmlərinin işə salınması üçün rəsmi müraciət edib, lakin bu müraciət rədd olunub.

Xatırladaq ki, Rusiya Xarici İşlər Nazirliyinin rəsmi nümayəndəsi Mariya Zaxarova bildirib:

"Ermənistanın "KTMT mexanizmlərini işə salaq" dediyi bir vəziyyət olmuşdu. Amma söhbət hansı ərazi və hansı vəziyyətdən gedirdi? Ermənistanın özünün nə öz ərazisi, nə də müstəqil dövlət kimi tanımadığı "Dağlıq Qarabağdan". Belə şəraitdə KTMT mexanizmlərini işə salmaq mümkün deyildi."musavat.com