UEFA Çempionlar Liqasının “Qarabağ” – “Kopenhagen” oyununun başlanmasına sayılı saatlar qalıb. Qarşılaşma oktyabrın 1-də Tofiq Bəhramov adına Respublika stadionunda keçiriləcək və saat 20:45-də start götürəcək. Bu qarşılaşma isə böyük maraq doğurur.

Azarkeşlərin ağlında isə bir neçə əsas sual var: Ağdam təmsilçisini favorit hesab etmək olarmı? İllər öncə olduğu kimi “Kopenhagen” üzərində üstünlük əldə edə biləcəyikmi?”

Mövzu ilə bağlı Ölkə.az-a danışan tanınmış idman jurnalisti, "Futbolpress" saytının baş redaktoru Elçin Cəlilov bildirib ki, “Qarabağ”ın ÇL-in əsas mərhələsinə yüksəlməsi maksimum nəticə idi.

Onun sözlərinə görə, bu mərhələdə isə hansısa oyunda favorit saymaq nəzəri baxımdan uyğun olmaz:

"Amma bu futboldur, sürpriz nəticələr çox olur. Necə ki, “Benfika” kimi köklü kluba qarşı səfərdə qazanılan qələbə. “Qarabağ” Pireney təmsilçilərinə qarşı daha yaxşı oynayır, çünki həm oxşar futboldur, həm də baş məşqçi Qurban Qurbanovun “əzbərində” sırf o dəsti-xətt üstünlük təşkil edir.

“Kopenhagen” isə bir qədər fərqli üslubda oynayır. Ovaxtkı “Kopenhagen”lə fərq çoxdur, güc və imkan baxımından rəqib indi daha təcrübəlidir".