Vətəndaşlar, Milli Hematologiya və Transfuziologiya Mərkəzindən ŞİKAYƏTLƏNİR - "Həkim qəbuluna düşə bilmirik, dərmanlarımız verilmir." - VİDEO
Regionda yeganə olan "Səhiyyə Nazirliyi Milli Hematologiya və Transfuziologiya Mərkəzi" Azərbaycanda nümunəvi səhiyyə müəssisəsi kimi özünü tanıtsa da, rəhbər dəyişikliyindən sonra xəstələrin narazılığı artıb.
Belə ki, 55 yaşlı Əzizov Samid Həmid oğlu Milli Hematologiya və Transfuziologiya Mərkəzində qeydiyyatdadır və 3-cü qrup əlildir. Pasiyentin verdiyi məlumata əsasən, o, uzun müddətdir bu mərkəzdə şöbə müdürü olan Quliyeva Elvira Abasqulu qızının nəzarəti altında müalicə alıb və müalicələrinin nəticələri hər zaman müsbət təsir edib. Lakin Səhiyyə Nazirliyinin əmrinə əsasən yeni təyin olunan icraçı direktor Əsədov Sərdar Əjdər oğlunun artıq həkim Quliyeva Elvira Abasqulu qızına mərkəzdə şöbə müdiri kimi xidmət etməsi səbəbi ilə xəstə qəbuluna icazə vermədiyi bildirilib.
Əzizov Samid Həmid oğlu 19 iyul, 23iyul, 6 avqust tarixlərində təkidlə Elvira xanımın müayinə qəbuluna düşmək istəsə də, buna nail ola bilməyib. İcraçı direktorun qəbuluna isə böyük çətinliklə düşən Əzizov Samid, müraciətini və şikayətlərini dilə gətirsə də, yenə nəticəsiz olaraq qalıb. 30 dəqiqəyə yaxın müzakirə olunan bu məsələdə xəstə, ona qarşı kobud rəftar olunduğunu bildirdib.
Samid Həmid oğlu ilə yanaşı Elvira Quliyevanın digər pasiyentləri də yaranan bu vəziyyətdən çox narazıdır. Bu şikayətlərə qoşulan, 12 ildir xəstəlikdən əziyyət çəkən bir başqa şəxs də Birinci Vitse Prezident Mehriban xanım Əliyevanın göstərişi ilə sözü gedən mərkəzdə qeydiyyata alınıb və Elvira xanımın müalicələri ilə səhhətində yaxşılaşma gedib. Amma o da eyni problemlərlə rastlaşıb və son zamanlar müalicəsi üçün vacib olan dərmanların gətirilmədiyini deyib. Artıq aylardır müalicəsi yarım qalan şəxs, həyatı üçün haqlı olaraq narahatdır. O, baş həkim Kamilə xanıma dərman qıtlığına görə şikayətçi kimi müraciət etsə də, Kamilə xanım bir çox dərmanların son zamanlar gətirilmədiyini bildirib. Baş həkimin cavabları həmin şəxsi qane etmədiyi üçün icraçı direktorun şəxsən qəbuluna yazılmaq istəsə də buna imkan verməyiblər.
Patrul.az olaraq məsələyə aydınlıq gətirmək üçün Elvira xanim Quliyeva ilə əlaqə saxlasaq da o, bu mövzu ilə bağlı fikir bildirməyəcəyini, Səhiyyə Nazirliyi və digər qrumlara yazılı şəkildə müraciət etdiyini və araşdırmaların nəticəsini gözlədiyini dedi.
Yaranmış bu qarışıqlıqdan narazı olan pasientlər Səhiyyə Nazirliyinə yazılı olaraq müraciət etdiklərini və bu işə baxılmayacağı təqdirdə Birinci Vitse Prezident Mehriban xanım Əliyevaya müraciət edəcəklərini bildiriblər.
Son zamanlar Səhiyyə Nazirliyinin tabeliyində olan bir çox xəstəxanalardan eşitdiyimiz özbaşınalıqlarla bağlı şikayətlər gündən-günə çoxalıb və artıq bu barədə tədbirlərin görülməyi vacib hal alıb. İnsan həyatı və sağlamlığı xidməti prinsiplər və qayda-qanun adı altında riskə atılacaq qədər ucuz deyil!
Qarşı tərəfin mövqeyini işıqlandırmağa hazırıq.
