Azərbaycanda uzunömürlü icra başçılarından biri də Xocavənd rayonuna rəhbərlik edən Eyvaz Hüseynovdur

FİA.Az xəbər verir ki, milli qəhrəman İbad Hüseynovun qardaşı olan E.Hüseynov Elçibəy hakimiyyəti dövründən bu vəzifədədir.

O, 1992-ci il, iyulun 2-də Xocavənd Rayon İcra Hakimiyyətinin başçısı vəzifəsinə təyin edilib. 26 ildir ki, bir rayonun icra başçısı olan E.Hüseynov qədər heç bir prezident və məmur postunda qalmayıb.

Hətta baş nazir Artur Rasi-zadə, keçmiş müdafiə naziri Səfər Əbiyev də E.Hüseynov qədər kreslo görməmişdi.

Əbədi icra hakimi təyin olunmuş Xocavənd rayon şefinin vəzifəsindən azad olunacağı haqda xəbərlər dolaşmaqdadır.

Bunun nə dərəcədə gerçək olduğu qeyri-müəyyəndir. Amma 26 ildir bir rayonun başçısı olması yuxarıları da qane etmir.

Aprel seçkilərindən sonra prezidentin kadr dəyişikliklərini sürətləndirməsi və nazirləri, icra başçılarını əvəzləməsi davam etməkdədir.

Bildirilir ki, E.Hüseynova verilən vaxt bitməkdədir. Xocavəndə artıq yeni rəhbər təyin olunması zamanı yetişib.

Eyvaz Hüseynov hələ 1992-ci ildə o zaman Milli Məclisin sədri postunu tutan İsa Qəmbər prezidentin səlahiyyətlərini icra edəndə onun sərəncamı ilə Xocavəndə icra başçısı təyin olunub.

Ondan sonra Əbülfəz Elçibəy prezident olanda da onu vəzifəsində saxlayıb. Sonrakı illərdə də bu dəyişməz qalıb və beləliklə Eyvaz Hüseynov bu minvalla ölkənin ən uzunömürlü məmuru ünvanını qazanmış olub.

Bununla bağlı bir çox xəbər portallarının verdiyi məlumata görə, Eyvaz Hüseynovun siyasi keçmişi kifayət qədər şübhəli məqamlarla zəngindir.

Məlumatlarda vurğulanır ki, özünü Qarabağ döyüşçüsü kimi təqdim etməyi xoşlayan Eyvaz Hüseynov əslində müəmmalı hərbi-siyasi oyunların əsas iştirakçılarından biri olub.

Belə ki, onun qiyamçı polkovnik Surət Hüseynovla, eləcə də separatçı Ələkrəm Hümbətovla çox sıcaq münasibətlərinin olması haqda mediada məlumatlar var.

FİA.Az KİV-ə istinadla xəbər verir ki, icra başçısı olduğu 22 il ərzində Eyvaz Hüseynov vəzifəsindən istifadə edərək böyük fermerə çevrilib.

Onun və qardaşlarının minlərlə qoyun-quzusu, mal-qarası, təsərrüfatı, ilxısı var. Xırda emal sexləri açıb özü üçün.

Hazırda bütün diqqətini biznesini genişləndirmək olan icra başçısının rayonu necə idarə etməsinə gəlincə isə bu sahədə durum sözün əsl mənasında bərbaddır. Eyvaz Hüseynov rayonu talamaqla məşğuldur.

Belə ki, rayondakı dövlət idarələrini çapıb-talayan Hüseynov heç bir şikayətə, xahişə məhəl qoymur.

Əksinə, yaxın adamlarına da şərait yaradır ki, məcburi köçkün taleyi yaşayan insanları ağır şərtlər altında soyub-talasınlar.

İddia olunur ki, icra başçısı şəxsən rayondakı dövlət idarələrinə hər ay qeyri-qanuni haqq ödəməyi tapşırıq verib. Faktiki olaraq rayonda korrupsiya, rüşvətxorluq və məmur özbaşınalığı hökm sürür.

Xocavənd rayonu faktiki olaraq işğalçı Ermənistan Ordusunun əlindədir. Eyvaz Hüseynov isə Qarabağda vuruşduğunu əsas gətirərək rayonu “ikinci işğal”a məruz qoyub.

Məlumata əsasən, Xocavənd rayonunda 6280 hektar torpaq sahəsi subsidiya yardımına yazdırılıb.

Bildirilir ki, sənədlərdə qeyd olunan 6280 hektar torpaq sahəsinin təxminən 4 min hektara yaxını rayon icra başçısı Eyvaz Hüseynov və onun müavini, aqrar məsələlər üzrə şöbənin müdiri Rəfael Mustafayev tərəfindən saxta sənədlər əsasında subsidiya yardımı siyahısına salınıb.

Məlumatda qeyd olunur ki, artıq uzun illərdir ki, Eyvaz Hüseynov 4 min hektar torpaq sahəsinə subsidiya yazıdırır və hər il bu yolla adı altında dövlət büdcəsindən yüz min manatlarla vəsaiti mənimsədiyi bildirilir.

Məlumatda qeyd olunur ki, Eyvaz Hüseynov müavini ilə əlbir olaraq 4 min hektar torpaq sahəsinə verilən 700 tona yaxın azot gübrəsini müxtəlif şəxslərin əli ilə Beyləqan, Ağcabədi və İmişli bazarlarına satdırıb.

Amma bu faktlar son deyil. Xocavənd şefi haqda yeni məlumatlar var ki, növbəti araşdırmalarda təqdim etməyə çalışacağıq.

Hörmətli icra hakiminin mövqeyini çap etməyə hazırıq.