Penitensiar xidmətin əməliyyat aparatının həyata keçirdiyi əməliyyat-axtarış tədbirləri nəticəsində 17 saylı cəzaçəkmə müəssisəsinə və həbsxanaya qadağan olunmuş əşyaların keçirilməsi cəhdinin qarşısı alınıb.
Penitensiar Xidmətin İctimaiyyətlə əlaqələr şöbəsindən “Ölkə.Az”-a verilən xəbərə görə, Ömürlük azadlıqdan məhrum edilmiş və həbsxanada saxlanılan məhkum Kazımov Arif Nazim oğlunun yanına qısa müddətli görüşə gəlmiş anası Qazax şəhər sakini Kazımova Tükəzban Camal qızının üzərinə və şəxsi əşyalarına baxış keçirilən zaman, əl çantasından daxilində danışıq kartı olan 1 ədəd mobil telefon aparatı aşkar edilib.
Həmçinin Cinayət Məcəlləsinin 234.1-ci maddəsinə əsasən 1 il 6 ay müddətinə azadlıqdan məhrum edilmiş və hal-hazırda 17 saylı cəzaçəkmə müəssisəsində saxlanılan məhkum Novruzov Araz Kamil oğlunun yanına qısa müddətli görüşə gəlmiş anası Bakı şəhər sakini Novruzova Minarə Bayram qızının üzərinə və şəxsi əşyalarına baxış keçirilən zaman, əl çantasından daxilində danışıq kartları olan 3 ədəd mobil telefon aparatı aşkar edilib. Qeyd olunan faktlarla bağlı araşdırma aparılır.